全球認知戰當中，hōng攻擊上嚴重ê國家，臺灣連紲11年來攏是世界第一。佇臺灣ê資訊流通，有時陣無影ê謠言通人知，有影ê事實煞hōng講做顛倒páinn。臺灣經濟啥款？產業界目前按怎咧發展？除了聽人傳話、看媒體報導，咱行tshuài用家己親身ê體驗來熟似臺灣、熟似臺灣人，上蓋直接。
多謝青基（台灣青年基金會），予少年人有機會遮爾倚近來接觸這寡佇第一線咧拚經濟、咧提升整體科技水準ê模範公司（或單位）。
我囡仔時看阮老爸佮in頭家佇社仔（臺北市士林區）一間較無20坪ê小工場內，佮彼間工場ê塗跤仝款，in彼雙手逐工攏創甲烏趖趖，in就是用傳統工作母機來做模仔ê師傅。這逝＜台中精機＞ê參訪，我頭一擺佇遮爾媠ê環境，對工具機用全新ê角度來熟似。這个產業打造各種機械、零件、模仔，嘛帶動咱臺灣頂一代ê經濟奇蹟，當然也貢獻阮規家伙仔ê經濟基礎。
＜康淳科技＞ê水質處理技術，毋但予廢水會使變做袂污染環境ê清氣水，甚至會使閣再利用。閣來，高科技需要ê超純水技術，康淳嘛成做是產業界堅強ê bak-kuh。創辦人佇問答階段，也應阮關於「自我管理ê撇步佮原則」。伊講做人頭家會起，家己袂使拚輸人，時間管理、品行要求攏愛並人較頂真。
對「滾珠螺桿」、「線性滑軌」，行到工業用機械手、機器人，＜上銀科技＞佇精密儀器ê進步，以雞母𤆬雞仔囝ê氣勢，解決國內工業界ê濟濟問題，嘛帶動臺灣整體工業水準ê提升、支持產業進步佮轉型，上銀也拍入世界一流ê線性傳動控制佮系統科技大廠。
除了以上彼寡佇臺灣過去真衝(tshìng)ê產業升級佮生湠，＜TASA（國家太空中心）＞予阮看著當欲起飛ê新產業，閣加上佇遮完整ê高科技供應鍊佮人才，咱對臺灣家己發展衛星佮火箭等等ê太空科技，會使誠有信心。
結業式邀請著大肚山產業創新基金會ê理事長-廖紫岑女士、榮譽董事長-林佳龍先生（我國現任外交部長），用該基金會眾先輩ê創業經驗、國際經驗，𤆬學員行一个總結性、大局性ê思考。
多謝遮爾濟前輩貢獻遮濟心血，尤其這擺營隊當中幾若个團體攏看會著林佳龍先生ê跤跡，過去伊ê選舉補助款也捐佇基金會內，成做一个社會進步ê資源，包括今仔日栽培著阮遮ê社會青年。這擺會使親身看這寡科技大廠，閣佇幾若个關鍵大人物面頭前聽in演講，感覺家己有夠好運才有遮價值ê機會。
《戰略產業暨國家建設參訪團》予這寡青年學員開闊視野，較知產業界ê現狀，好通為未來做閣較完整ê思考，做閣較有理路ê拍算。
這个營隊將關心產業發展、理念相仝ê人結做伙，學習效果加倍以外，人脈ê建立原仔是真可貴ê價值。相信活動過後，營隊ê影響力閣會繼續發酵。（煞）／張景盛／台語老師
